Ofnbökuð grísalund með sætum kartöflum

Hitið ofninn í 180 °C og takið grísalundina úr kæli um stundarfjórðungi áður en þið byrjið, svo hún sé ekki ísköld.

Þerrið lundina með eldhúspappír, penslið hana með helmingnum af ólífuolíunni og nuddið kryddblöndunni, saltinu og piparnum vel á allar hliðar.

Hitið pönnu við háan hita og lokið lundinni í 1 til 2 mínútur á hverri hlið þar til hún er fallega brúnuð allan hringinn. Leggið hana svo í eldfast mót.

Skerið sætu kartöflurnar í frekar þunnar sneiðar. Steikið þær upp úr afganginum af ólífuolíunni á sömu pönnu í 3 til 4 mínútur á hvorri hlið, þar til þær eru nokkuð brúnar.

Raðið kartöflusneiðunum í eldfasta mótið í kringum lundina og stingið rósmaríngreinunum á milli.

Bakið í ofninum við 180 °C í 15 til 20 mínútur, eða þar til kjarnhiti kjötsins nær 68 °C. Notið kjöthitamæli, það er eina örugga leiðin.

Takið mótið úr ofninum, leggið álpappír lauslega yfir og látið kjötið hvíla í um 10 mínútur. Kjarnhitinn hækkar þá í 70 til 72 °C og safinn jafnast út.

Skerið lundina í þykkar sneiðar, raðið henni á fat með sætu kartöflunum, stráið steinselju yfir og berið fram, til dæmis með piparsósu.